Жил бүрийн тав, есдүгээр сарын гурав дахь долоо хоногийн амралтын өдрүүдэд уламжлал болгон зохион байгуулдаг “Үндэсний номын баяр” 33 дахь удаагийн арга хэмжээ энэ сарын 26-28-ны өдрүүдэд тохиож байна. Бүх нийтээр ном унших соёлыг түгээн дэлгэрүүлж, номоор дамжуулан хүүхэд залуусыг соён гэгээрүүлэх, зохиолч, хэвлэн нийтлэгчдийг алдаршуулах зорилготой номын баярыг Улсын Их Хурлын дарга Г.Занданшатар өнөөдөр /2023.05.26/ албан ёсоор нээлээ.
Тэрбээр, Номын баярыг бид өргөн хүрээнд тэмдэглэдэг боллоо. Цаашид энэ баяртай хамт үндэсний бичиг үсэг, монгол үндэстний биет болон биет бус соёлын өвөө түгээн дэлгэрүүлэх нь нэн чухал юм. Монгол Улсын Соёлын яам энэ чиглэлд анхаарлаа хандуулж, Монгол орон даяар үндэсний бичиг, соёл, номын өдрүүдийг тэмдэглэдэг болох нь зүйтэй.
Монголын өргөн уудам нутаг даяар үндэсний бичиг үсэг, түүх соёл, ном эрдмийн гэгээн давлагаа түгэн дэлгэрч байх нь энэхүү өдрүүдийг тэмдэглэхийн учир утга юм хэмээн онцолсон.
Улсын Их Хурлын дарга Г.Занданшатар, Номын баярт оролцож байгаа бяцхан уншигчдадаа зориулж, УИХ-ын Тамгын газраас эрхлэн “Үндсэн үлгэр” хэмээх номыг бүтээж, Номын баярын өмнөхөн хэвлэлтээс аваад байна. Энэ номд Монгол Улсын Үндсэн хуулийн үзэл баримтлал, ардчилал, хүний эрх, парламентат ёсны үндсэн ойлголтуудыг хүүхдэд ойлгомжтой хэл, дүрслэлээр бичсэн гэв.
Энэ жилийн Номын баярын нэг онцлог бол Улсын Их Хурлын Тамгын газар болон Монголбанк, Сонгуулийн ерөнхий хороо, Үндэсний статистикийн газар, Хүний эрхийн үндэсний комисс, Санхүүгийн зохицуулах хороо зэрэг байгууллагууд үйл ажиллагааны чиглэлээрээ иргэдэд мэдээлэл хүргэж байна.
Нээлтийн үйл ажиллагааны дараа Улсын Их Хурлын дарга номын худалдааны асруудаар явж танилцсан. Энэ үеэрээ Улсын Их Хурлын Тамгын газраас эрхлэн гаргасан “Үндсэн үлгэр” номын дээжээс 21 аймгийн номын санд бэлэглэлээ.
“Илүү их уншъя” уриатай Үндэсний номын баяр тавдугаар сарын 26, 27, 28-ны баасан, бямба, ням гарагт Д.Сүхбаатарын талбайд үргэлжилнэ. Номын баярт 300 гаруй уран бүтээлч, зохиолч, яруу найрагч оролцож, өөрсдийн бүтээлээ борлуулж байна хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.
