Үе үеийн салбарын сайдууд хийгээд холбогдох албаныхны амыг тэгсхийгээд таглачихдаг газар бол “ПетроЧайна Дачин Тамсаг” ХХК. Аль ч Засгийн үед энэ компанийн асуудлыг хөндсөөр ирдэг ч дорвитой өөрчлөлт орохгүй явсаар өдийг хүрсэн. Тухайлбал, уг компанийг орон нутгийн мэргэжлийн ажилчдыг ажилд авахгүй байна, байгаль орчинд хор хөнөөл учруулж, туслан гүйцэтгэгчээр монгол компаниудыг оролцуулахгүйн зэрэгцээ худалдан авалт, тендерийн мэдээллээ ил тод зарлахгүй байгааг жил бүр л тодотгодог. Олон ч удаа салбарынх нь сайд нар үүрэг хариуцлага хүлээлгээд буцдаг байсан.
Энэ Засгийн газрын үед ч Уул уурхай, хүнд үйлдвэрийн сайд Д.Сумъяабазараар ахлуулсан холбогдох албаныхан нөхцөл байдалтай танилцаж орон нутгаас олборлолтын операторчныг заавал авах үүрэг хүлээлгэхийн зэрэгцээ худалдан авалтаа ил тод болгохыг даалгасан.
Харамсалтай нь өдийг болтол газрын тосны салбарыг дагаж тухайн орон нутагт худалдаа үйлчилгээ, ханган нийлүүлэлт хөгжих ёстой байтал хөгжөөгүй, мэргэжлийн боловсон хүчнүүд ажлын байраар хангагдаагүй байгаа юм.
Мөн БОАЖ-ын сайд Н.Цэрэнбат нөхцөл байдалтай танилцах үеэрээ байгаль орчны нөхөн сэргээлтийг стандартын дагуу мэргэжлийн байгууллагаар нь хийлгэж, газры тос олборлолтын үйл ажиллагаа явуулахдаа байгальд ээлтэй техник технологи ашиглаж, ахуйн үйлдвэрийн хог хаягдлыг стандартын дагуу боловсруулан, замын бүтээн байгуулалтаа дуусгахыг анхааруулсан байдаг ч мөн л бодит байдал дээр аль ч асуудал шийдэгдээгүй байна.
Энэ мэт аль ч Засгийн үед хөндөгдөөд орхигддог эл асуудалд хэн цэг тавих нь тодорхойгүй байгааг салбарынхан хийгээд холбогдох хүмүүс шүүмжилж эхэллээ. Үүрэг хариуцлага хүлээлгэсэн бол түүнийгээ эргэж нягталдаг, тушаал шийдвэр гаргасан бол түүнийгээ дагаж мөрдүүлж чаддаг байх ёстой.
