Нийслэлийн Засаг дарга бөгөөд Улаанбаатар хотын Захирагч Д.Сумъяабазар өнөөдөр Азийн хөгжлийн банкны ерөнхий менежер М.Тереса Хо, Монгол Улс дахь суурин төлөөлөгч Павит Рамачандран тэргүүтэй төлөөлөгчдийг хүлээн авч уулзлаа.
Уулзалтын эхэнд Хотын дарга сүүлийн 30 жилийн хугацаанд Монгол Улсын нийслэл Улаанбаатар хотын хөгжилд чухал хувь нэмэр оруулж, дэмжин ажиллаж ирсэнд талархал илэрхийлэв. Түүнчлэн Улаанбаатар хотод тулгамдаж буй асуудал болох төвлөрлийг бууруулах, гэр хорооллыг дахин төлөвлөх, орон сууцжуулах зэргийг шийдвэрлэхэд туслалцаа үзүүлэн, хамтран ажилладаг хамгийн том түнш бол Азийн хөгжлийн банк гэдгийг онцоллоо. Мөн бонд гаргах, сан бий болгох, төр, хувийн хэвшлийн түншлэлийг хөгжүүлэх, концессын төсөл хэрэгжүүлэх, нийслэлийн хөрөнгийн удирдлага, өрийн менежментийг сайжруулах, чадавхыг бэхжүүлэх чиглэлээр Азийн хөгжлийн банктай хамтран ажиллах саналтай байгаагаа уламжилсан юм.
Азийн хөгжлийн банкны зүгээс түгжрэлийг бууруулах, орон сууцжуулах төслүүдийг маш чухал ач холбогдолтойг цохон тэмдэглээд тус банкнаас техник туслалцааны төсөл хэрэгжүүлж байгаа гэлээ. Түүнчлэн хамтран ажиллах төслүүдийг хэрэгжүүлэхэд нэгдсэн ойлголтод хүрч, шуурхай ажиллах хэрэгтэйг онцлов.
Мөн Азийн хөгжлийн банкны ерөнхий менежер М.Тереса Хо “Сонгинохайрхан нэгдсэн эмнэлэг болон бусад дүүрэгт хэрэгжих жишиг эмнэлгийг тун ач холбогдолтой ажил. Иймээс нийслэлийн зүгээс бүх талаас дэмжиж ажиллах хэрэгтэй” хэмээн ярилаа.
Нийслэлийн Засаг дарга бөгөөд Улаанбаатар хотын Захирагч Д.Сумъяабазар жишиг эмнэлгийн бүтээн байгуулалтад бүх талаас дэмжлэг үзүүлэхээ тодотгосон юм. Мөн тэрбээр Монгол Улсын Засгийн газрын “Цахим монгол” зорилтын хүрээнд Улаанбаатар хотын хөрөнгө оруулалт, хот төлөвлөлт, өмчийн удирдлагын системийг цахимжуулах төслүүдийг эхлүүлэхээр Азийн хөгжлийн банктай хамтран ажиллах хүсэлтэй байгаагаа илэрхийллээ.
Талууд гэр хорооллын нийтийн тээврийн үйлчилгээг сайжруулах, түгжрэлийг бууруулах, хот төлөвлөлтийн чиглэлээр хамтран ажиллах боломжуудыг судлахаар тохиролцов.
