Эмэгтэй волейболчид анхны хожлоо авлаа

Волейболын эмэгтэйчүүдийн клубүүдийн Азийн аварга шалгаруулах тэмцээн Вьетнамын Вин-Вук хотод болж байгаа.

Монголын эмэгтэйчүүдийн шигшээ буюу "Хөвсгөл Эрчим" клуб "В" хэсгийн эхний хоёр тоглолтдоо БНХАУ-ын "Лиаонинг Донгхуа", Казахстаны "Алтай" клубт 0:3-аар тус тус хожигдсон юм.

Харин өчигдөр Монголын шигшээ баг гурав дахь тоглолтоо Хонконгийн "Хип Хинг" клубтэй хийж 3:1-ээр буулган авчээ.

Манай баг эхний партад 22:25-аар хожигдсон ч удаах гурван үед 25:9, 25:20, 25:17-гоор илүүрхэж, ялалт байгуулсан байна.

Монголын шигшээ баг хэсгийн сүүлийн тоглолтоо Тайландын “Даймонд Фүүд Файн Чеф-Эйр Форс" багтай өнөөдөр хийнэ.