БСШУС-ын сайдаар Г.Чулуунбаатар томилогдлоо

Өнгөрсөн долоо хоногийн чуулганы хуралдаанаар Засгийн газраас БСШУС-ын сайд Ж.Батсуурь нь ажиллах хугацаандаа эрхлэх асуудлын хүрээний салбарыг нэгдсэн удирдлагаар хангах, төрийн бодлого боловсруулах, хууль тогтоомжийг хэрэгжүүлэх үүргээ хангалтгүй биелүүлж, албан үүрэгтээ хариуцлагагүй хандсан гэсэн үндэслэлээр түүнийг огцруулсан. Тэгвэл өчигдөр Ерөнхий сайд Ж.Эрдэнбат БСШУС-ын сайдаар академич Г.Чулуунбаатарыг  томилох асуудлыг УИХ-д өргөн барьсан. Харин дөнгөж сая  УИХ-ын чуулганы нэгдсэн хуралдаанаар уг асуудлыг хэлэлцэж, шийдвэрлэлээ. Санал хураалтад 52 гишүүн оролцож, 49 гишүүн дэмжсэнээр академич Г.Чулуунбаатар БСШУС-ын сайдаар томилогдлоо. Хуралдааны үеэр гишүүд санал хэлж, асуулт, асууж хариулт авлаа.

Хэлэлцүүлгийн шатанд УИХ-ын гишүүн А.Сүхбат:Боловсролын системд өөрчлөлт хийх үү "Ж.Батсуурь сайдын үедл боловсролын системийг өөрчлөх ажлыг эхлэх талаар ярьж байсан. Энэ талаар хариулт авмаар байна" гэв. Үүний хариуд нэр дэвшигч Г.Чулуунбаатар "УИХ-ын гишүүдийн хэлсэн үгнээс харахад шинэчлэл хийх шаардлагатай байгаа нь харагддаг. Үүнийг өөрчлөхийн төлөө ажиллана" гэлээ.

Мөн УИХ-ын гишүүн Д.Тэрбишдагва "БСШУ спортын салбар л даа. Энэ их том салбар, дөрвөн салбар бий. Монгол Улсыг дэлхийд гаргах ганц зүйл нь соёл, түүх байгаа юм. үүнд анхаарч ажиллаарай. Эрдэмтэн хүн очиж байна. эрдэмтэн хүн мундаг. Гэхдээ салбар хариуцсан сайд гэдэг улстөрч, сайн менежер байх ёстой. Улаанбаатар хотын захын дүүргүүдийн ачаалал хэд дахин илүү. Тэнд ажилладаг цэцэрлэгийн эрхлэгч, багш нар, ажилчдын ачаалал их байдаг. Хэдийгээр амралт эхэлж байгаа ч ажлаа аваад сургууль, цэцэрлэгт өөрийн биеэр очоосой гэж хүсч байна. Боловсролын салбарт дутагдаж байгаа нэг зүйл нь мэргэжилтэй боловсон хүчин бэлтгэх явдал. Монгол Улсын үйлдвэр аж ахуйг дэмжих тийм л хүмүүс хэрэгтэй байна. мэргэжлийн боловсон хүчин бэлтгэхэд онцгойлон анхаарч ажиллаарай. Их дээд сургуулийн холбоо, хүрээлэнгийн холбоог сайн шийдэхгүй бол болохгүй нь" хэмээлээ. Харин УИХ-ын гишүүн Л.Болд "Нийслэл ачааллаа дийлэхээ больсон. Оюутнуудын амралт болохоор амьсгалахад чөлөөтэй болдог. Нийслэл рүүгээ хөгжсөн нь энэ цаг үеийн хамгийн буруу бодлого байгаа. Бид Багануур дүүрэгт оюутны комплекс хийх гээд мөн ч олон жил боллоо. Их, дээд сургуулийг хотоос гаргана гэхээр сургуулийн удирдлагууд хоорондоо лобби зохиочихдог. Тэгэхээр сайхан оюутны комплекс барьчихвал сургуулиуд өөрсдөө гарах гэж хичээдэг болно" гэдгийг сануулсан юм.

Чуулганы хуралдаан үргэлжилж байна.