Азийн хөгжлийн банк (АХБ)-наас Монгол Улсын эрүүл мэнд, дэд бүтцийн салбарыг хөгжүүлэхэд зориулж 101.5 сая ам.долларын зээл, 1.5 сая ам.далларын буцалтгүй тусламж олгох болжээ.
Уг зээлийн гэрээнд Сангийн сайд Ч.Хүрэлбаатар, АХБ-ны Монгол Улс дахь суурин төлөөлөгч Ёланда Фернандез Ломмен нар гарын үсэг зурлаа.
Уг зээлийн 27 сая ам.доллароор “Хилийн үйлчилгээг сайжруулах бүс нутгийн төсөл”-ийг хэрэгжүүлэх юм. Төслийн хүрээнд Бичигт, Боршоо боомтыг шинэчлэх, Алтанбулаг, Сүхбаатар боомтын барилга байгууламж, тоног төхөөрөмжийг сайжруулна. Мөн Гаалийн автоматжуулсан системийн өргөтгөл, гадаад худалдааны цахим нэг цонхны үйлчилгээг нэвтрүүлэх аж.
“Бүс нутгийн авто замыг хөгжүүлэх, засвар, арчлалтын төслийн нэмэлт санхүүжилт” болох 60 сая ам.долларыг Хүйтний хөндий-Арвайхээрийн 58 км авто зам, Улаанбаатар-Дарханы 204 км авто замын их засвар, шинэчлэлтэд зориулна. Харин 16 сая ам.долларыг “Эрүүл мэндийн салбарын хөгжил хөтөлбөр-4”-ийн хүрээнд Сонгинохайрхан дүүрэгт барьж буй дүүргийн нэгдсэн эмнэлгийн ажлыг дуусгахад зарцуулах юм.
Хоёр хувийн хүүтэй, 25 жилийн хугацаатай зээл байх бөгөөд зээлийн үндсэн төлбөрөөс чөлөөлөх хугацаа таван жил байна.
