УИХ-ын гишүүн Д.Гантулгатай холбоотой хэргийн явц, АТГ-аас гаргасан шийдвэрийн талаар Хүний эрхийн хуульч М.Ичинноров, хохирогчийн эгч Ч.Саранзаяа нар мэдээлэл хийлээ. хэвлэлийнхурлын эхэнд хуульч М.Ичинноров “Өнгөрсөн долоодугаар сарын 25-нд АТГ-т өгсөн өргөдөлийг тав хоногт шалгаж, хариу өглөө. Тэр хариунд авлигын хэрэг илрээгүй гэдгийг дурдсан байна. Харин эрүүгийн хэрэг үүсгэх үндэслэлтэй хэмээн прокурор, цагдаагийн байгууллагад шилжүүлэх мэдэгдэх хуудас явуулсан байна. Авлигын хэрэг далд явагддаг. Үүнийг илрүүлэхэд хугацаа шаардлагатай, гэрчүүдийг байцааж, нууц ажиллагаа явуулдаг. Гэтэл АТГ чухал гэрчүүдийг дуудаж байцаахгүйгээр тавхан хоногт шалгаад хаачихлаа. УИХ-ын гишүүнийг АТГ хаацайлж, түүнд давуу байдал олгож байна. Харин бид цагдаад итгэж, найдаж байна. Цагдаа шаардлагатай бүх нотлох баримтуудыг шалгаж, сайн ажиллах байх” гэв. Түүнчлэн уг асуудлаар УИХ-ын Хуульзүйн байнгын хороонд хандад байгаа гэнэ. Ингэхдээ УИХ-ын гишүүн Д.Гантулгыг эргүүлэн татах хүсэлтийг тавих юм байна.
Харин хохирогчийн эгч Ч.Саранзаяа “Миний фэйсбүүк хаягийг хаасан. Бас хуурамч хэд хэдэн хуудас үүсгээд, 500 сая төгрөг аваад алга болчихлоо гэсэн мэдээлэл тавьсан. Би өөрийнхөө нэрийг ашиглаад нийгмийн сүлжээнд мэдээлэл оруулах боломжгүй болсон. Би маш олон баримтыг фэйсбүүк хуудсаараа дэлгэж байсан. Тэгээд миний хуудсыг хаасан. Би энэ хэргийн эцсийг хүртэл явна. Гэтэл хуулийн байгууллагууд ажиллахгүй байна. Цаг хугацаа хожиж, залхаан цээрлүүлэх маягтай олон тийш нь явуулж байна. Би 500 сая төгрөг авсан бол энд хэвлэлийн хурал хийгээд суух уу. Би мөнгөний төлөө явсан бол Д.Гантулгыг тохиролцъё гэж байхад нь мөнгө аваад алга болж болох байсан. Хүнд мөнгөөр үнэлж болохгүй, үнэт зүйл гэж байдаг юм” гэлээ.
