БХЯ-ны хамт олон хүндийн өргөлтийн ОУХМ М.Анхцэцэгийн дүү М.Номин-Эрдэнэд зургаан сая төгрөгийн хандив өглөө.
М.Номин-Эрдэнэ нь өнгөрсөн намар хүнд түлэгдэж, БНСУ-ын “Ханган сү” эмнэлэгт 65 сая төгрөгийн хагалгаанд орох шаардлагатай болжээ. Түүний аав дэд хурандаа Мөнхжанцан Афганистан улсад энхийг сахиулах ажиллагаанд оролцож байгаа юм. Тиймээс хамт олон нь М.Номин-Эрдэнэд туслахаар шийдвэрлэж нэг өдрийн цалин буюу нийт зургаан сая төгрөг хандивласныг өнөөдөр Батлан хамгаалахын сайд Б.Бат-Эрдэнэ гардуулсан байна. Мөн Монголын үйлдвэрлэгчдийг дэмжих холбоо, Хүндийг өргөлтийн холбоо гишүүд 1.1 сая төгрөг хандивлажээ. М.Номин-Эрдэнэ туслахаар Хүндийн өргөлтийн шигшээ багийн хамт олон өдөр бүр 20-23 цагт Үндэсний цэцэрлэгт хүрээлэнд хандивын аян өрнүүлж байгаа юм.
М.Номин-Эрдэнэ охинд туслах хүсэлтэй иргэн, аж ахуйн нэгжүүд ээж Д.Мөнхчимэгийн Хаан банкин дахь 5071320523, Худалдаа хөгжлийн банкин дахь 451038475 ХХБ дансанд хандив өргөж болох аж.
