Нөөцийн махны худалдааг ирэх сараас эхлүүлэх талаар ХХААХҮЯ-наас мэдээлэл өгөв. Засгийн газраас нийслэлийн хүн амын энэ оны хаврын улирлын хэрэгцээнд зориулан нөөцийн мах бүрдүүлэхэд анхаарч байна. Энэ хүрээнд 13 мянган тонн махны нөөц бүрдүүлэхээр 23 ААН ажиллаж, бэлтгэл ажил 90 гаруй хувьтай үргэлжилж байна.
Өнөөдрийн байдлаар аж ахуйн нэгжүүд 12 мянган тонн мах нөөцөлжээ.
Өнгөрсөн жил зуншлага сайн байсантай холбоотойгоор махны чанар, өнгө үзэмж сайн байна. Чанар, эрүүл ахуй, аюулгүй байдлын хувьд малын өвчин гараагүй бүс нутаг, аймаг, сум, багаас бэлтгэх шаардлагыг онцгойлон тавьж, мал эмнэлгийн гарал үүслийн гэрчилгээгээр давхар хянан баталгаажуулж байна. Ингэснээр нөөцийн махны худалдааг 3 дугаар сард Улаанбаатар хотын Захирагчийн ажлын албатай хамтран зохион байгуулах гэж байна.
