Өнөөдрийн байдлаар зорилтод бүлгийн буюу насанд хүрсэн иргэдийн 440 мянга гаруй иргэн буюу хүн амын 25 орчим хувь нь дархлаа сэргээх нэмэлт ГУРАВДУГААР тунд хамрагдаад байна.
Улсын Онцгой комиссын Эрдэмтдийн зөвлөлийн судалгаагаар 3-р тун вакцин хийлгэсний дараа Дельта вирусийн халдвар авсан тохиолдолд хүндрэх, нас барах эрсдэлийг 90 -ээс дээш хувиар сэргийлнэ.
Хэрэв манай улс өдөрт 20 мянган хүнийг 3-р тунд хамруулж, дархлаажуулалтын хурдыг дөрөв дахин нэмж чадвал 2021 оны 12 дугаар сарын 31 гэхэд нийт нас баралтын тоог 2000-д хүргэхгүй тогтоон барих боломжтой гэдгийг эрдэмтэд судалгаагаар тогтоосон байна.
Монгол Улсын Шадар сайд, Улсын онцгой комиссын дарга С.Амарсайхан өнөөдөр вакцины цэг дээр очиж гуравдугаар тундаа хамрагдаж, иргэдийг гуравдугаар тундаа хамраглахыг уриаллаа.
Гуравдугаар тунд хамрагдсан хүмүүсийн хувьд эрүүл мэндэд учрах хүндрэл болон нас баралтаас сэргийлэх хувь хэмжээ маш өндөр байгааг судлаачид сануулж байгааг Шадар сайд хэллээ. Иймд ард иргэд та бүхэн эрсдэлээс сэргийлж, энгийн амьдралдаа эргэн орохын төлөө вакцины 3-р тундаа идэвхтэй хамрагдах нь чухал байгааг онцоллоо.
Эрүүл мэндийн яам, дархлаажуулалтын төвөөс иргэдэд хандан хоёрдугаар тунгаа хийлгэснээс хойш 3 сараас дээш хугацаа өнгөрсөн, ковидын халдвараар өвчилснөөс хойш 21 дээш хоног өнгөрсөн бол вакцины гуравдугаар тунд хамрагдахыг зөвлөж байгаа юм.
