-Бүтээн байгуулалтын ажил эхэлсэнтэй холбогдуулан газар чөлөөлөлтийн ажил хэрхэн явагдаж байна?
Улсын хөрөнгө оруулалтаар хийж буй бүтээн байгуулалтын ажлууд хавраас эхлээд судалгаа, зураг төслөө бэлэн болгоод ажлууд нь эхэлчихсэн явж байгаа. Бид газар дээр нь долоо хоног бүр явж үзэж, шалгаад газар чөлөөлөлтийн явц хэр байна вэ гэдгийг дүгнэсэн. Одоогийн байдлаар нийт 9 замын ажил хийгдэж байгаагийн долоогийнх нь газрыг бүрэн чөлөөлсөн. Эдгээр нь 100 хувийн гүйцэтгэлтэй байна. Замын цагдаагийн уулзварын зам, яармагийн давхар гүүрний замууд дээр зураг төслөөс шалтгаалсан өөрчлөлт байгаа. Үндсэндээ 80-90 хувийн гүйцэтгэлтэй явагдаж байна.
-Орц, гарц хаасан болон зөвшөөрөлгүй хашаа, барилга зэргийг чөлөөлөх ажлыг явц ямар байгаа вэ?
-Нийслэлийн Засаг дарга иргэдийн эрүүл аюулгүй орчинд амьдах нөхцөлийг хангуулах үүднээс орц, гарцыг чөлөөлөх захирамж гаргасан. Энэ захирамжийн хүрээнд эхний ээлжинд судалгаа хийж үзэхэд нийслэлийн хэмжээнд зөвшөөрөлгүйгээр ТҮЦ байрлуулах, хашаа хатгах, өргөтгөл, барилга барих зэргээр 129 газар орц гарцыг хаасан байна. Өнөөдрийн байдлаар нийт 71 газрыг чөлөөлсөн.
Үлдсэн байршилд том хэмжээний барилга байшин баригдчихсан байна. Эдгээрийг хуулийн хүрээнд хэрхэн чөлөөлөх арга хэмжээ авах вэ гэдэг бодлогыг боловсруулж, хууль, хяналтын байгууллагад хандан шийдвэрлүүлэхээр саналаа өгсөн. Захирамжийн хүрээнд эхний ээлжинд Улаанбаатар хотын орон сууцны хороолол, байгууллагуудын орц гарцыг чөлөөлөх гэсэн нэгдүгээр үе шат хэрэгжинэ.
Дараагийн ээлжинд зуслангийн ногоон бүсийн орц гарцыг чөлөөлөх юм. Зуслангийн хэсэгт айлууд нэг нэгнийхээ орц, гарц, ногоон бүс, ой модыг хааж хашаа барих зэрэг нийтлэг зөрчил байгаа. Үүнийг шийдэхээр дүүргийн Засаг дарга нарт албан тоот хүргүүлсэн. Гуравдугаарт, гал команд, цагдаа, түргэн тусламж хүрч чадахгүй байгаа гэр хорооллын айлууд байна. Онцгой байдлын газар, Авто замын газар болон тухайн хорооны Засаг дарга нараас судалгааг нь аваад төлөвлөгөө боловсруулаад явж байгаа.
-Орц, гарц чөлөөлөх ажлыг иргэд, ААН-үүд хэрхэн хүлээн авч байгаа вэ?
-Одоогоор чөлөөлөгдсөн байршлууд дээр иргэд, ААН-үүд зөвшөөрөлгүйгээр дур мэдэн барилга, байшин барьж орц, гарц хаасан байсан. Жишээлбэл, СӨХ-үүд иргэд, оршин суугчдыг зорчих боломжгүйгээр хашаа хаалт хийж байна. Иргэд, оршин суугчдын хувьд орц, гарцыг чөлөөлөх ажлыг маш сайн дэмжиж байгаа.
Зөрчилтэй газрын тухай санал, мэдээллүүд иргэдээс их ирж байна. Тухайн саналуудыг бид ажилдаа авч хэрэгжүүлж, судалгаа хийгээд шаталбар төлөвлөгөө боловсруулаад ажиллаж байгаа. Нэг жишээ дурьдахад, БЗД-ийн 13-р хороололд иргэдээс олон санал, мэдээлэл ирсэн. Газар дээр нь очоод зөвшөөрөлгүй барьсан ганцхан гараашийг буулгахад авто машины хоёр урсгалтай зам бий болж тухайн хэсгийн зорчих хэсэг чөлөөтэй болсон.
-Замын трасст орсон иргэн ААН-ийн газрыг чөлөөлөх ажил ямар явцтай байгаа вэ?
-Бид замын ажил бүрт газар чөлөөлөлтийн судалгааг гаргасан. Жишээлбэл, Сонгинохайрхан дүүргийн Толгойтод баригдаж байгаа 3.6 км замын ажилд өртсөн 89 иргэн, ААН, байгууллага бий. Эдгээрээс зөвшөөрөлгүй 30 ТҮЦ, нийслэлийн Засаг даргын захирамжтай дөрвөн ААН, дүүргийн Засаг даргын захирамжтай 55 иргэн, аж ахуйн нэгж байсан. Манай Газар чөлөөлөх хэлтсээс тухайн иргэн аж ахуйн нэгжүүдэд мэдэгдэл хүргүүлдэг. Зөвшөөрөл бүхий үнэлгээний компаниудаар газрын үнэлгээг нь хийлгэж, иргэдтэй тохиролцож чөлөөлсөн байгаа.
Энэ тохиролцоо үр дүнтэй явагдаж, газар чөлөөлөлтийн ажил дунджаар 98 хувьтай байна. Өмнөх жилүүдтэй харьцуулахад иргэд маань ухамсар өндөр болсон. Нийслэлийн томоохон бүтээн байгуулалт явагдаж байгааг ойлгож, үнэлгээн дээр асуудал үүсэхгүй тохиролцож байна.
