Утааны эсрэг ээж аавууд" ТББ энэ жил агаарын бохирдлыг бууруулах чиг үүрэгтэй төрийн байгууллагуудын гадаа цуврал жагсаал хийхээр төлөвлөсөн билээ. Эхний жагсаал нь өнгөрсөн сарын 10-нд Хотын захиргааны гадаа Хотын дарга С.Батболдод хаягласан байсан. Харин хоёр дахь жагсаалаа өнөөдөр Хүний эрхийн үндэсний комиссын дарга Ж.Бямбадоржид хандан Ялалтын талбайд жагслаа. Тэд хүний эрх хамгийн ихээр зөрчигдсөн нөхцөлд амьдарч байгаа иргэдийнхээ өмнөөс дуугаран ийнхүү жагсан юм.
Жагсаалд оролцогсод “Амьсгалах эрхийг минь хангаж өгөөч”, “Ж.Бямбадоржоо эмнэлгийн коридороор яваад үзээч”, “"Та хамраа нээ!", "Та ядахдаа өөрийнхөө уушгины төлөө дуугараач" гэсэн уриа лоозон барьцгаасан байлаа.
Жагсаалд оролцож байгаа нэгэн иргэн хэлэхдээ: "Утаа ихтэй өглөө хүүхдүүдээ хичээлд нь явуулмааргүй байна. Онц ноцтой ийм утаатай үед цэцэрлэг сургуулийг амраах хэрэгтэй. Хүүхдүүд хордож байна. Тэд үгүй гэж хэлж чадахгүй. Хүүхдүүд маань утааны ноцтой хохирогчид болж байгаа" гэсэн байна.
Тэд дараагийн жагсаалыг Агаарын бохирдлыг бууруулах газрын гадаа хийхээр төлөвлөжээ.
