Тусгаарлагдаж байгаад гэртээ гарсан байсан олон улсын тээврийн жолооч болон түүний гэр бүлийн хүнээс коронавирусний халдвар илэрсэн нь лабораторийн шинжилгээгээр тогтоогдлоо. Тиймээс Улсын онцгой комисс яаралтай хуралдаж өнөөдөр буюу 11 дүгээр сарын 11-нээс эхлэн гурав хоног нийслэлд хөл хорио тогтоолоо.
Энэ хугацаанд халдвар авсан хүмүүстэй ойр байсан хүмүүсийг тогтоох ажлыг хийх аж. Гурав хоногийн хугацаанд бүх шатны боловсролын байгууллага, цэцэрлэг, сургууль, их дээд сургууль, сургалтын төвүүдийг хааж, Улаанбаатар хотоос гарах авто болон төмөр замын хөдөлгөөнийг хаана. Урлаг соёлын үзвэр үйлчилгээ, олон нийтийн газруудын үйл ажиллагааг түр зогсоохоор болов. Харин нийслэл рүү орох хөдөлгөөн одоогоор нээлттэй байна. Мөн нийтийн тээвэрт тодорхой зохицуулалт хийх аж.
Иргэдийн зүгээс айж тэвдэлгүй амны хаалтаа зүүж, гараа сайтар угаан, шаардлагагүй тохиолдолд хүүхдүүдээ гаргахгүй байх, олон нийтийн газарт очихгүй байхыг УОК зөвлөж байна.
