Монгол Улсын Ерөнхийлөгчийн санаачлагаар зохион байгуулж буй “Ногоон санхүүжилт-Бүс нутгийн чуулган” хоёр дахь өдрөө Төрийн ордонд үргэлжилж байна.
Чуулганы хөтөлбөр ёсоор өнөөдөр (2022.03.30) уур амьсгалын өөрчлөлт, цөлжилтийн эсрэг тэмцэх “Тэрбум мод” үндэсний хөдөлгөөнийг дэмжин оролцож буй дотоодын банк, санхүүгийн байгууллагууд, томоохон аж ахуй нэгжүүд "БАТЛАМЖ"-д гарын үсэг зурлаа.
Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнд банк, санхүүгийн салбар, мэргэжлийн холбоод нэгдэж, 88 сая гаруй мод тарьж ургуулахаа баталгаажуулж, санамж бичигт гарын үсэг зурлаа.
Салбарынхан уур амьсгалын өөрчлөлтийн нөлөөллийг бууруулах, цөлжилт, газрын доройтолтой тэмцэх, ой мод, ойн санг нэмэгдүүлэх, усны эх үүсвэр, нөөцийг хамгаалах, экологийн тэнцвэрт байдлыг хангах зорилтыг дэмжин, 2030 он хүртэл хугацаанд мод тарьж ургуулж, арчлан хамгаалахаа баталгаажуулав.
Батламжид Байгаль орчин, аялал жуулчлалын сайд Б.Бат-Эрдэнэ болон аж ахуйн нэгжүүдийн удирдлага, төлөөлөл гарын үсэг зурлаа.
Ёслолд Монгол Улсын Ерөнхийлөгч У.Хүрэлсүх, Монгол Улсын Ерөнхий сайд, Уур амьсгалын өөрчлөлт, цөлжилтийг бууруулах үндэсний хорооны дарга Л.Оюун-Эрдэнэ, БОАЖ-ын сайд Б.Бат-Эрдэнэ албаны бусад хүн оролцов.
Эхний ээлжинд нийт 17 мэргэжлийн холбоо, аж ахуйн нэгж 88 сая 600 мянган мод тарьж ургуулахаар нэгдээд байна.
Үүнд:
“Монголын банкны холбоо” /Арилжааны 11 банк/ – 50, 000, 000
“Хургатай хайрхан” ХХК – 10, 000, 000
“Нью прогресс групп” ХХК – 10, 000, 000
Даатгалын мэргэжлийн холбоод /”Монголын даатгалын холбоо”, “Албан журмын даатгалын холбоо”, “Даатгалын зуучлагчдын холбоо”, “Монголын хөрөнгө, хохирол үнэлэгчдийн холбоо”/ – 5, 000, 000
“Монголын банк бус санхүүгийн байгууллагуудын холбоо” – 2, 750, 000
“Монголын хадгаламж, зээлийн хоршоодын үндэсний холбоо” – 1, 250, 000
“Монголын үнэт цаасны арилжаа эрхлэгчдийн холбоо” – 1, 000, 000
“Ард санхүүгийн нэгдэл” ХК – 1, 000, 000
“Монголын ипотекийн корпораци” ХК – 1, 000, 000
“Эрдэнэ ресурс девелопмент” ХК – 1, 000, 000
“Эрхэт монгол групп” ХХК – 1, 000, 000
“Грийнпинус” ХХК – 1, 000, 000
“Инвескор ББСБ” ХХК – 1, 000, 000
“Сэндли” ББСБ – 750, 000
“Бичил глобус финанс” ББСБ – 500, 000
Үл хөдлөх хөрөнгийн бизнес эрхлэгчдийн “Дээвэр” нэгдсэн холбоо – 300, 000
“Ханбогд кашимер” ХХК – 300, 000
Байгаль орчин, аялал жуулчлалын яам “Тэрбум мод” үндэсний хөдөлгөөнд нэгдсэн аж ахуйн нэгжүүдийг мод тарьж ургуулах арга, аргачлал, технологийн нэгдсэн зөвлөмжөөр хангаж, бүх талаар дэмжих юм.
